Janë pak filma sot që marrin mundin të shkojnë në Afrikë për të sjellë atmosferën origjinale në film.

Lësho një perde të gjelbër, dhe vazhdo!

Ky origjinalitet i jep “Mogambo”-s atë nuancën e një romance të gërshetuar me aventurë, dhe krejt kjo në një ambient sa magjepsës aq edhe sfidues.

E në Afrikë gjendet Viktori, një gjuetar i zellshëm, i cili nëpër punën e tij fillon të bie në dashuri me Eloizën, një grua aristokrate nga Amerika, me të cilën takohen rastësisht kur mbesin të ngujuar në safari.

Por, Eloiza s’do të jetë e vetmja e ngujuar, pasi i njëjti fat do të ndjekë edhe një çift britanik, Lindën dhe burrin e saj, antropologun, Donaldin.

Me tu shfaqur këta të dy, dashuria që po fillonte mes Viktorit dhe Eloizës fillon të lëkundet kur ai nis të shohë Lindën më afër zemrës së tij.

Megjithëkëtë, aktrimi i Ava Gardner në rolin e Eloizës, e bën edhe atë, edhe karakterin e saj të vjedhin skenën, edhe këtë seri shkrimesh të dedikuara për Grace Kellyn, e cila vjen në rolin e Lindës.

Karizma e Gardnerit vërehet në çdo skenë të cilën ajo arrin ta zotërojë, edhe kur në atë akt ka Clark Gabble i cili vjen në rolin e Viktorit. Harmonia e të dyve është e fortë edhe kur nuk ndajnë të njëjtën skenë.

Regjia e John Ford e bën këtë film pak më ndryshe nga të zakonshmit për punën e tij, duke provuar të mbajë nuancat e romancës, e për Clark Gabble është reprizë e rolit të njëjtë që kishte pasur në filmin Red Dust, i vendosur 20 vite para këtij, por në Indokinë, në vend të Afrikës.

Një film për fansat e Hollywoodit klasik dhe yjeve të kësaj periudhe, të vendosur në një ambient magjepsës për syrin. Nota personale: 3/5